Farhangistan
خانه / اجتماع / بحران مهاجرت / نگرانی مهاجران افغانستان از اخراج اجباری در تاجیکستان

نگرانی مهاجران افغانستان از اخراج اجباری در تاجیکستان

کابل/۱۳سنبله/فرهنگسنان
برخی از مهاجران افغانستان در تاجیکستان می‌گویند که مهاجران در روزهای پسین به اتهام تخلف‌های قانونی از سوی پولیس آن کشور بازداشت و اخراج شده اند.
مهاجران افغان مقیم تاجیکستان می‌افزایند که برخی از این مهاجران هرچند سندهای قانونی داشته اند، اما با آن هم با خانواده‌های شان از تاجیکستان اخراج شده اند.
یک بانوی افغان که با خانواده‌اش چهار سال پیش از افغانستان به تاجیکستان رفته است، ادعا می‌کند که شوهرش شنبه هفته گذشته از سوی پولیس تاجیکستان بازداشت و به افغانستان برگردانده شده است.
مهاجر افغان در تاجیکستان گفت: «دیروز یک روز بد را من سپری کردم، در زیر بلاک شوهرم را تاجیک‌ها گرفتند و گفتند که امنیت بردند و از آنجا خبر شدم که شوهرم را بدون اینکه پرس و پال کنند بدون اینکه کدام جرم داشته باشد بدون کدام دلیل در مرز روان کردند طرف قندوز.»
یک ویدیو که به دسترس رسانه‌ها قرار گرفته که نشان می‌دهد؛ سی تن از مهاجران افغان به گونه اجباری به افغانستان فرستاده شده اند.
مهاجر افغان در تاجیکستان، در این باره گفت: «وضعیت مهاجرین افغانستان بسیار خراب است، همگی ما در حالت ترس استیم؛ لطفا به داد افغان‌ها برسین (برسید) بسیار وضعیت وخیم است.»
عبدالواحد حقیقت، آگاه مسایل حقوق بین‌الملل، می‌گوید: «یک سلسه حقوقی را برای مهاجرین در نظر گرفته از جمله حقوق و آزادی‌های فردی است برای مهاجرین، حق زندگی و امنیت است برای مهاجر در کشوری که پناهنده شده است و حق منع شکنجه است.»
محمد غوربندی، آگاه مسایل حقوقی، گفت: «حق داشتن مهاجرت است حق عدم اخراج است در صورتیکه زندگی منظم می‌داشته باشند و اخلال نمی‌کنند امنیت را و یا منافع عامه کشور را.»
سخنگوی وزارت مهاجران و عودت کنندگان این کار تاجیکستان را خلاف قوانین جهانی مهاجرت می‌خواند و می‌گوید تلاش می‌ورزند تا چنین مشکلات را از راه گفت‌وگو حل کنند.
عبدالمطلب حقانی، سخنگوی وزارت مهاجران و عودت کنندگان، گفت: «وزارت مهاجرین تلاش می‌کند تا مشکلات مهاجرین افغان در تاجیکستان را از راه گفت‌وگو حل کند و این اقدام کشور تاجیکستان خلاف قوانین جهانی مهاجرت است.»
مهاجرانی که از تاجیکستان به افغانستان فرستانده شده‌، از شهر وحدت و ناحیه رودکی تاجیکستان بوده‌اند.
خبرنگار فرهنگستان از کابل
سمیع صدیقی

دیدگاهتان را ثبت کنید

آدرس ایمیل شما منتشر نخواهد شدعلامتدارها لازمند *

*